पेस्तोलसहित रुपन्देहीमा एक जना पक्राउ

रुपन्देहीको सिद्धार्थनगर–७ विद्यापथमा प्रहरीले पेस्तोल र ४ राउण्ड गोलीसहित ४४ वर्षीय अजय चौधरीलाई नियन्त्रणमा लिएको छ।

सियारी–२ निवासी चौधरीले चोरीका मोटरसाइकललाई नक्कली कागजात तयार गरी बेचबिखन गर्ने गरेको गोप्य सूचनाका आधारमा प्रहरीले चेकजाँच गर्दा उनको साथबाट टाइप–५४ जस्तो देखिने पेस्तोल १ थान, गोली ४ राउण्ड, एउटै फोटो भएको ब्लुबुक २ थान र भारतीय आधारकार्ड ४ थान बरामद भएको प्रहरीले जनाएको छ।

प्रहरीले बरामद सामग्रीसहित चौधरीलाई कानुनबमोजिम नियन्त्रणमा लिई घटनाबारे थप अनुसन्धान भइरहेको जिल्ला प्रहरी कार्यालय रुपन्देहीले जनाएको छ।