​बागलुङ प्रहरीको भदौभरको गतिविधि : नावालिकामाथि जबर्जस्ती करणी देखि साइबर अपराध सम्मका आरोपीपक्राउ

​ओझेलका खबर, बागलुङ।
जिल्ला प्रहरी कार्यालय बागलुङले भदौ महिनाको प्रगति विवरण सार्वजनिक गर्दै समाजमा घटेका गम्भीर अपराध र साइबर अपराधका घटनाहरूमा अनुसन्धान तीव्र पारिएको जनाएको छ।

​प्रहरीले सार्वजनिक गरेको विवरण अनुसार, बागलुङ नगरपालिका–८ मा १५ वर्षीया नाबालिग छोरीलाई ललाइफकाइ पटक-पटक जबर्जस्ती करणी गरेको अभियोगमा ‘बागलुङ ८ (ख)’ लाई जाहेरीका आधारमा पक्राउ गरी कानुनबमोजिम अनुसन्धान अघि बढाइएको छ।

​त्यसैगरी, पर्वत जलजला गाउँपालिका–७ स्थायी घर भई बागलुङ नगरपालिका–३ बस्ने ३९ वर्षीय वीर बहादुर सुनारलाई साइबर अपराध र ब्ल्याकमेलिङको आरोपमा पक्राउ गरिएको छ।

आरोपीले एक महिलासँगको चिनजानका क्रममा खिचिएको किस गरेको तस्बिर देखाएर शारीरिक सम्पर्कको प्रस्ताव राखेको र नमानेमा तस्बिर सामाजिक सञ्जालमा हालेर बेइज्जत गरिदिने धम्की दिएका थिए।

पछि उक्त तस्बिर फेसबुकमा पोस्ट गरी बदनाम गराएपछि पीडितको जाहेरीका आधारमा उनलाई प्रहरीले नियन्त्रणमा लिएर अनुसन्धान गरिरहेको छ।

​भरुवा बन्दुक, लागूऔषध र फरार प्रतिवादी पक्राउ

प्रहरीले भदौ महिनामा अवैध हातहतियार नियन्त्रण अभियान अन्तर्गत १ नाले भरुवा बन्दुक ३ नाल र ३ गोला बरामद गरेको छ। यस्तै, १ केजी ५०० ग्राम गाँजा र ३८० ग्राम चरेससहित एक महिलालाई पक्राउ गरिएको छ। चालु मुद्दाका ८ जना र अदालतबाट कैद तथा जरिवाना तोकिएका ५ जना फरार प्रतिवादीहरूलाई समेत पक्राउ गरी कारबाहीको दायरामा ल्याइएको प्रहरीले जनाएको छ।

​१४ वटा महिला तथा बालबालिका सम्बन्धी मुद्दा दर्ता

भदौ महिनाभर जिल्लामा कुल १९ वटा मुद्दा दर्ता भएकामा १४ वटा मुद्दा महिला, बालबालिका तथा ज्येष्ठ नागरिकसँग सम्बन्धित रहेका छन्। यस्तै, आत्महत्यातर्फ ३ जनाले झुन्डिएर ज्यान गुमाएका छन्।

​जिल्ला प्रहरी कार्यालय बागलुङका निमित्त सूचना अधिकारी प्रहरी निरीक्षक याम नारायण अर्यालका अनुसार, जिल्लामा अपराध न्यूनीकरणका लागि सादा पोसाकमा प्रहरी परिचालन, क्राइम म्यापिङ र विद्यालय/समुदायस्तरमा सचेतनामूलक कार्यक्रमहरू निरन्तर सञ्चालन भइरहेको  छ  ।