चेक गणतन्त्रमा अहिलेसम्मकै सबैभन्दा भव्य नेपाली कार्यक्रम

 प्राग, चेक गणतन्त्र: अन्तर्राष्ट्रिय नेपाली कलाकार समाज (INAS CZ) को आयोजनामा वैशाख ७ गते तदनुसार अप्रिल २० तारिकका दिन नेपाली नयाँ वर्ष २०८२ को अवसर पारेर चेक गणतन्त्रको राजधानी प्रागमा सांस्कृतिक कार्यक्रम सम्पन्न भएको छ। करिब २५० जनाको सहभागिता अहिलेसम्मकै सबैभन्दा भव्यतापूर्वक सम्पन्न भएको बताइएको छ।

करीब २५० जना नेपाली र विदेशी सहभागीहरूको उपस्थितिमा सम्पन्न उक्त कार्यक्रमलाई चेक गणतन्त्रमा अहिलेसम्मकै सबैभन्दा ठूलो र उत्कृष्ट नेपाली सांस्कृतिक कार्यक्रम भएको भन्दै सहभागीहरुले खुलेर प्रशंसा गरेका थिए। कार्यक्रम औपचारिक र सांस्कृतिक गरी दुई सत्रमा विभाजन गरिएको थियो।

औपचारिक सत्रमा कार्यक्रमको अध्यक्षता अन्तर्राष्ट्रिय कलाकार समाज, चेक रिपब्लिकका अध्यक्ष, गैर आवासीय नेपाली संघ, चेक रिपब्लिकका वरिष्ठ उपाध्यक्ष तथा कृषि-पर्यावरण वैज्ञानिक डा. गिरीप्रसाद कंडेलले गर्नुभएको थियो। त्यसैगरी प्रमुख आतिथ्यता गैर-आवासीय नेपाली संघ, चेक रिपब्लिकका अध्यक्ष तथा INAS का सल्लाहकार बैकुण्ठ रायमाझीको रहेको थियो।

कार्यक्रममा विशेष अतिथिका रूपमा जितेन्द्र रायमाझी, छत्र रायमाझी, छवि कँडेल, अञ्जिला थापा क्षेत्री, अञ्जना रायमाझी, सन्जय अधिकारी, सुर्य सुवेदी, अनिल लामा, सुजन देवकोटा, विष्णु रायमाझी, करण बोहोरा लगायत अन्य प्रतिष्ठित व्यक्तित्वहरूको उपस्थिति रहेको थियो।

सत्रको सञ्चालन INAS CZ का महासचिव अर्जुन भट्टराई, उपाध्यक्ष मञ्जु रिमाल तथा सदस्य आसा कौचाले संयुक्त रूपमा गर्नुभएको थियो।

सांस्कृतिक सत्र – पानीजहाजमा पहिलो पटक
यस वर्षको विशेषता भनेको कार्यक्रम पहिलो पटक पानीजहाज (Boat Cruise) मा आयोजना गरिएको हो, जुन प्रागको भल्ताभा नदीमा सम्पन्न भयो। नेपाली गीत, नृत्य, नाटक, र प्रत्यक्ष सङ्गीतले भरिएको उक्त सांस्कृतिक यात्रा सहभागीहरूको लागि अविस्मरणीय अनुभव बन्यो।

कार्यक्रमको मुख्य आकर्षण मध्ये एउटा थियो, ९ वर्षीया चेक बालिकाद्वारा प्रस्तुत गरिएको नेपाली गीत, जसले दर्शकहरूको मन जित्यो र नेपाली संगीतको अन्तर्राष्ट्रिय पहुँचको प्रतिक बनेको महसुस गराएको थियो। यो व्यवस्थापन गर्नुहुने सङ्गीत थापा सर्गम प्रति इनास अध्यक्ष लगायत उपस्थित परिवार आभार प्रकट पनि गरेको थियो।

पहिलो पटक लाइभ ब्यान्ड र नाटक
INAS CZ ले यसपटक पहिलो पटक लाइभ म्युजिक ब्यान्ड प्रस्तुत गरेको थियो, जसमा सङ्गीत थापा सर्गम, प्रताप मोक्तान र डा. विजय गुरुङको नेतृत्वमा चेक गणतन्त्रका नेपाली संगीतकर्मीहरूले प्रस्तुति दिएका थिए।

त्यस्तै, पहिलो पटक नेपाली सामाजिक नाटक पनि प्रस्तुत गरिएको थियो, जसको निर्देशन डा. विजय गुरुङ र मञ्जु रिमालले गर्नुभएको थियो। नाटकले प्रवासी जीवनका संघर्ष र सामाजिक यथार्थलाई छर्लङ्ग चित्रण गरेको थियो। साथसाथै नेपाली लोक तथा मौलिक गीतहरु बैकुण्ठ रायमाझी, अन्जना रायमाझी, सुरेन्द्र थापाको गीतमा दर्शकहरु झुमेर नाचेका थिए। उसैगरु सुमधुर सङ्गीत, आधुनिक, पप अनि रक गीतहरुमा डा. विजय गुरुङ्ग, सङ्गीत थापा सरगम, प्रताप मोक्तान, सुजन तिम्सिना लगायत कलाकारहरुले दर्शकलाइ झुमाउनु भएको थियो। साथै टेक्निकलतर्फ नोभेल भुजेल र रविन अर्यालले हेर्नुभएको थियो।

INAS Czech Musical Band को औपचारिक घोषणा
यसै कार्यक्रम मार्फत INAS CZ ले आफ्नो आधिकारिक संगीत समूह ‘INAS Czech Musical Band’ को घोषणा पनि गर्‍यो।

ब्यान्डका सदस्यहरू यसप्रकार छन्:
• गायकहरू: सङ्गीत थापा सर्गम, डा. विजय गुरुङ, प्रताप मोक्तान
• ड्रम: अकिब मानन्धर
• गिटारिस्ट: प्रताप मोक्तान, सुजन तामाङ
• मादल: जय गुरुङ, चेत कार्की
• बाँसुरी: अशोक परियार
• काजोन: गोपाल कँडेल
• हरमोनियम: सङ्गीत थापा सर्गम, बैकुण्ठ रायमाझी

नेपाली कला र संस्कृति अन्तर्राष्ट्रिय मञ्चमा
प्रवासमा रहेका नेपालीहरूबीच एकता, सांस्कृतिक चेतना र पहिचानको प्रवर्द्धन गर्ने उद्देश्यसहित आयोजना गरिएको यो कार्यक्रमले नेपाली समुदायमा नयाँ ऊर्जा र आत्मगौरव थपेको विश्वास आयोजकको रहेको छ। कार्यक्रम सफलतापूर्वक सम्पन्न गर्न सहयोग गर्ने सम्पूर्ण सहयोगी, कलाकार, स्वयंसेवक, अतिथि तथा सहभागीहरूप्रति INAS CZ ले आभार व्यक्त गरेको छ।

INAS CZ का अध्यक्ष डा. गिरीप्रसाद कँडेलले आगामी दिनमा अझ व्यापक सांस्कृतिक कार्यक्रमहरूसँगै नेपाली कला र संस्कृती अन्तर्राष्ट्रिय स्तरमा फैलाउने अभियानलाई सशक्त रूपमा अघि बढाइने बताउनुभयो।