गुल्मी आउदै गरेको बस पाल्पामा दुर्घटना, ७ जनाको मृत्यु

टोपराज शर्मा, बुटवल: बुटवलबाट मलामी बोकेर रिडी जादै गरेको बस पाल्पाको लगुवामा दुर्घटना हुँदा मृत्यु भएका ७ जनामध्ये तीनजनाको सनाखत भएको छ।

बुटवल ११ बुद्धनगरका बीरबहादुर विकको शवको अन्त्येष्टिका लागि ३६ जना मलामी बोकेको लु २ ख ७२७९ नम्बरको बस तानसेन-रिडी सडकखण्ड अन्तर्गत पाल्पाको रिब्दिकोट-२ लगुवामा आइतबार बिहान ११ बजेतिर दुर्घटना भएको थियो।

दुर्घटनामा परी मृत्यु भएकामध्ये बुटवल बुद्धनगरका लालबहादुर विक, पशुपति रसाइली र विजय थापा क्षेत्रीको खनाखत भएको लुम्बिनी प्रदेश प्रहरी कार्यालय बुटवलका डीएसपी मोहन खाँणले जानकारी दिए।

मलामी गएका उमेश कुंवरका अनुसार मृतक लालबहादुर बीरबहादुरका छोरा हुन्। प्रहरीले भने यसबारे अझै पुष्टि हुन बाँकी रहेको बताएको छ। मृतक विक परिवार अर्घाखाँचीको मरेङबाट बुटवलमा बसाई सरेका कुंवरले बताए।

सडकबाट करिब डेढसय मिटर तल खसेर बस दुर्घटना हुँदा ७ जनाको घटनास्थलमा मृत्यु भएको थियो। दुर्घटनामा घाइतेमध्ये गम्भीर घाइते १० जनाको मिसन अस्पताल र लुम्बिनी मेडिकल कलेज प्रभासमा उपचार भइरहेको छ।