पहिलोपल्ट छुवाछुतमुक्त समाजमा दशैँ मनाउँदै ढोरपाटनवासी

प्रेम सुनार: केहि महिना अघि मात्र छुवाछुतमुक्त वडा घोषणा भएको बागलुङ्गको ढोरपाटन नगरपालिका-३ का दलित समुदायहरुले यसपाली पहिलो पटक समतामुलक समाजमा दशैँ मनाउँदै छन्।

उक्त वडालाई छुवाछुत मुक्त वडा घोषणा गरिएपछि पहिलाेपटक समतामुलक दशैँ मनाएका हुन्।

ढोरपाटन नगरपालिकाका मेयर देवकुमार नेपालीले भने, ‘म आफु पनि दलित समुदायकै भएकोले मुलुकका लागि नयाँ पहिचान दिनु पर्छ, दलितहरुको हकहितका लागि केहि गर्नु पर्छ भन्ने सोचेर साविक बुर्तिबाङ गाविस-८ हाल ढोरपाटन नगरपालिका-३ को घोसाखानी गाउँलाई छुवाछुत मुक्त वडा घोषणा गरिएको हो।’

उनले त्यस वडामा प्रायः सिंङ्गो दलित समुदाय रहेको र अन्य वर्ग समुदाय पनि चेतनशील भएको र उहाँहरु समेतको सहयोग समर्थनमा त्यस वडालाई छुवाछुतमुक्त वडा घोषणा गरिएकोले कुनै चुनौती आई नपरेको बताए। मेयर नेपालीले छुवाछुत मुक्त वडा सम्भवत देशमै पहिलो भएको हुन सक्ने सुनाए।

उनले आगामी मंसिर महिना सम्म ठुलै कार्यक्रम राखेर सिङ्गो ढोरपाटन नगरपालिकालाई नै छुवाछुतमुक्त नगरपालिका घोषणा गर्ने तयारी गरिएको जानकारी दिए।

छुवाछुतमुक्त घोषणा भएको त्यस वडा स्थित दलित चेतनशीेल युवा क्लवका अध्यक्ष रामबहादुर विकले मेयर देवकुमार नेपाली कै पहलमा छुवाछुतमुक्त वडा घोषणा गर्न सकिएको बताए।