मुसिकोटमा एक जनाको शव फेला

गुल्मी, मङ्सिर १९ । गुल्मीको मुसीकोटमा एक जना पुरुषको शव फेला परेको छ । त्यस नगरपालिका–५, इन्द्रेगौडाको भित्री सडकमा ४० वर्षीय यमबहादुर विकको शव फेला परेको हो ।

​सोही पालिका–९, अर्लाङकोट घर भई इन्द्रेगौडा स्थित रामु अर्यालको घरमा गत करिब १० वर्षदेखि काम गर्दै आएका विकको शव अर्यालको घरदेखि अन्दाजी ३ किलोमिटर पूर्वमा पर्ने भित्री सडकमा फेला परेको जिल्ला प्रहरी कार्यालयका प्रहरी निरीक्षक पर्वतकुमार के.सी.ले जानकारी दिनुभयो ।

​घटनाको जानकारी पाउन साथै, अस्थायी प्रहरी चौकी इन्द्रेगौडाबाट प्रहरी हवल्दार कृष्णमोहन केवटको कमान्डमा ३ जनाको टोलीले तत्काल घटनास्थल सुरक्षित राखेको र थप अनुसन्धानका लागि आज बिहान जिल्ला प्रहरी कार्यालय गुल्मीबाट प्रहरी निरीक्षक पर्वतकुमार के.सी.को कमान्डमा ७ जनाको टोली पुगेर अनुसन्धान सहित मुचुल्का उठाएको थियो।

​मृतकको घरमा श्रीमती, १ छोरा र १ छोरी रहेका छन् । उनले दैनिक जसो मदिरा सेवन गर्ने गरेको प्रहरीको बुझाइ छ ।