अर्खलेमा आगलागी हुँदा घर जलेर नष्ट

गुल्मी, कार्तिक ६: गुल्मीको अर्खलेमा आज बिहानपख आगलागी हुँदा एक घर जलेर पूर्ण रुपमा क्षति भएको छ।

रेसुङ्गा नगरपालिका-४ मा पर्ने अर्खलेका ईश्वरी प्रसाद भण्डारीको तीन तले टिनले छाएको कच्ची घरमा आज बिहान करिब ४ बजेको समयमा विद्युत सर्ट सर्किट भई आगोलागी हुँदा पुर्ण रुपमा क्षति भएको हो।

घर संगै अन्नपात, लत्ताकपडा, भाडा वर्तन जलेर क्षति भएको जिल्ला प्रहरी कार्यालय गुल्मीले जनाएको छ।

सो कार्यालयका अनुसार भण्डारीको सोही घर संग जोडिएको पक्की घरको छतमा बनेको टिनले छाएको २ वटा कोठा समेत जलेर आंशिक क्षति भएको छ। मानविय तथा चौपाया क्षति नभएको भन्ने जानकारी प्रहरीले बिहान ४:३५ बजे खबर पाए लगत्तै प्रहरी हवल्दार लोकराज पोख्रेलको कमाण्डमा ६ जनाको टोली उक्त स्थानमा पुगेको थियो।

प्रहरी, स्थानीय र दमकलको सहयोगमा बिहान ५:४५ बजेको समयमा आगो नियन्त्रणमा लिईएको प्रहरीले जनाएको छ।