‘मलाई नाम होइन, पहिचान बनाउनु छ’

नाम त जन्मिँदै पाइन्छ, तर पहिचान? त्यो त जीवनले लेख्ने आत्मकथा हो।

नाम कसैले राखिदिन्छ, तर पहिचान आफ्नै पाइलाले बनाउनु पर्छ। यही आत्मनिर्भर यात्रामा छु म — जहाँ चिल्ला सडकहरू छैनन्, तर स्पष्ट उद्देश्य छ। जहाँ चकचके चर्चाको मोह छैन, तर कर्म र मूल्यको सम्मान छ। मलाई ठूलो नाम होइन, गहिरो अर्थ बोकेको जीवन–पहिचान बनाउनु छ।

आजको समाजमा हजारौँ नामहरू छन् — फेसबुकमा, युट्युबमा, समाचारमा । तर तीमध्ये कति जना छन् जसलाई कर्मले चिनिन्छ? म चाहन्छु, मेरो परिचय बोलिले होइन, योगदानले देखियोस्। पद वा प्रचारको पछि लागेर बनाएको नाम त क्षणिक हो, तर इमानदार कर्मबाट बनाइएको पहिचान समयभन्दा बलियो हुन्छ।

देशका असंख्य युवाहरू सपनाको भारी बोकेर विदेश जान्छन् । म भने गाउँमै बसेर सपना जिउन खोज्दैछु । मैले देखेको पहिचान सहरको शोभामा होइन, माटोको गन्धमा छ। मैले मञ्चमा भाषण गर्ने भन्दा खेतमा पसिना बगाउने सपना देखेको छु। मलाई विश्वास छ — देशको रूपान्तरण माइक्रोफोनबाट होइन, माटो समाएर काम गर्दा हुन्छ।

म रेडियोमार्फत आवाजको खेती गर्छु, गीतमार्फत चेतना रोप्छु, सिर्जनाले समाजको मन छोइदिन्छु। यी सबै प्रयासहरूको एउटै उद्देश्य छ — नाम कमाउने होइन, पहिचान बनाउने । किनभने वास्तविक पहिचान त्यो हो, जुन पुरस्कारले होइन, जनसमर्थनले बनिन्छ।

म सकारात्मक सोचलाई आफ्नो ईन्धन बनाएको छु। जब कोही भन्छ — “यहाँ केही हुँदैन”, म भन्छु — “यहाँ केही गर्न सकिन्छ।” निराशाले थिचेको देशमा आशाको उज्यालो बोकेर हिँड्नुपर्ने जिम्मेवारी हामी युवाहरूको काँधमा छ। आज म सानोतिनो योगदान दिँदैछु, भोलि त्यसले ठूलो प्रभाव पारोस् भन्ने कामना राख्छु।

काठमाडौंबाट गाउँ फर्किँदा धेरैले सोधे — “तपाईंको लक्ष्य के हो?” मैले सधैं एउटै उत्तर दिएँ — “मलाई पद होइन, प्रभाव चाहिएको हो। मलाई प्रचार होइन, परिवर्तन चाहिएको हो। मलाई नाम होइन, पहिचान बनाउनु छ।”

गाउँमै बसेर सिर्जना गरिरहँदा मैले महसुस गरेको छु — साँचो शक्तिको मूल स्रोत यही समाज हो। त्यसैले म समाजलाई फर्काउन चाहन्छु: आशा, चेतना र योगदान।

आज म भन्न चाहन्छु — म नाम होइन, काम हुँ। मेरो मूल्य नामले होइन, कर्मले आँकियोस्। पहिचान भनेको त्यो हो जुन कागजमा होइन, जनताको हृदयमा लेखिन्छ। नाम सँगालेर राखिन्छ, तर पहिचान समयको इतिहासमा अमर हुन्छ।

त्यसैले म दिनरात काम गर्दैछु, लेख्दैछु, सिक्दैछु,
किनभने मलाई नाम होइन, पहिचान बनाउनु छ।

लेखक गुल्मीको सामुदायिक रेडियो धुर्कोटका स्टेसन म्यानेजर तथा चर्चित गीतकार समेत हुन्।