निर्माणको क्रममा २ पटक भत्किएको झेँदी पुल तेश्रो पटक बन्न थाल्यो

गुल्मी: गुल्मीको मुसिकोट नगरपालिकाको केन्द्र वडा नं ७ वामी र वडा नं ३ जोड्ने बडिगाड खोलामा पक्की पुल निर्माणको काम पुन : सुरु भएको छ । निर्माणको क्रममा २/२ पटक भत्किएको उक्त पुल पुन : निर्माण हुन थालेपछि स्थानीय खुसी भएका छन् ।

पुल निर्माणको जिम्मा पाएको निर्माण कम्पनीले निर्माण सकिसक्नुपर्ने बेला भएपनि यद्यपी पुन ढिलै भएपनि निर्माणको काम सुरु भएको हो । यसपटक भने निर्माणले गतिलिन थालेको छ । अहिले पिल्लर सहित अन्य फलामे फिटिङ बोडिहरु तयार गर्ने काम भईरहेको छ ।

‘पहिलो पटक पुल बन्न लाग्दा निकै खुसी थियौँ, बन्न लागेको २ पटक भत्किँदा अब पुल नै बन्दैन जस्तो लाग्यो स्थानीय वडा नं ७ झेँदीका अर्जुन केसीले भन्नुभयो -अहिले फेरी निर्माण सुरु हुन लाग्दा पुल बन्छकी भन्ने आशा जागेको छ ।’

सोही ठाउँका स्थानीय चुरा बहादुर नगरकोटीलाई भने यसपटक पनि पुल बन्छ भन्ने आशा लागेको छैन । ‘खै बीचमा पनि ठेकेदारले काम गरेजस्तो गरेर गए २/२ पटक बनाउँदै भत्कियो सबै सम्पन्न भएर गाडी चल्न थालेमात्रै विश्वास होला- उहाँले भन्नुभयो ।

मुसिकोट नगरपालिकाको वडा नं २, ३ र ४ का स्थानीय प्रत्यक्ष लाभान्वित हुने उक्त पुल निर्माणको क्रममा पहिलो पटक २०७६ साल बैशाख १ गते र दोश्रो पटक त्यसको १ वर्षपछि २०७७ साल वैशाख ३ गते निर्माणकै क्रममा भत्किएको थियो ।

५५ मिटर लामो बडिगाढ खोलामाथि बन्दै गरेको उक्त पुल निर्माणका लागि जलप नेपाल कम्पनीले निर्माणको काम सुरु गरेको हो । स्वीस सरकारको आर्थिक तथा प्राविधिक सहयोगमा पुल निर्माण हुँदैछ ।

पहिलेको भन्दा केही डिजाईन परिवर्तन गरि पुल निर्माण गर्न लागिएको छ । यस पटक बेलिब्रिज पुल निर्माण गर्न लागिएको हो । निर्माण व्यवसायी मोतिलाल सापकोटाले यस अगाडी २०७८ फाल्गुणमै निर्माण सुरु गरिएपनि स्वीस सरकारबाटै नक्सा स्वीकृत हुनपर्ने र केही संरचना थप भएका कारण निर्माणमा ढिलाई भएको बताए । अब बैशाखसम्म निर्माणको काम सकिने उनको भनाई छ ।

ट्रष्ट बडर प्रविधि मार्फत बन्दै गरेको पुल पुरानै फाउण्डेसनमा निर्माण हुनेछ । पुरानो डिजाईन भन्दा केही नयाँ प्रविधिको डिजाईनबाट पुल निर्माण हुन लागेकाले यस पटक भने पहिले जस्तो भत्किने डर नरहेको सापकोटाको भनाई छ ।

उक्त पुल निर्माण भएमा मुसिकोट नगरपालिकाका ३ र ४ वटा मात्रै नभएर नगरपालिकाका ९ वटै वडाका नागरिकलाई सदरमुकाम तम्घास पुग्न र छिमेकी बागलुङ जिल्लाका नागरिकलाई समेत सहज हुनेछ । मुसिकोट केन्द्र वामीदेखि सदरमुकाम पुग्न अहिले रहेको ३४ किलोमिटर यात्रा १० किलोमिटर घट्ने छ ।

त्यस्तै वडा नम्बर १ देखि ४ सम्मका नागरिकलाई नगरपालिका केन्द्रसम्म आउन समेत सहज हुनेछ ।