सर्लाही । वैदेशिक रोजगारीसम्बन्धी विवाद र रकम असुलीको उद्देश्यले एक व्यक्तिलाई अपहरण गरी बन्धक बनाइएको घटना सार्वजनिक भएको छ। जिल्ला प्रहरी कार्यालय सर्लाहीले अपहरणमा परेका व्यक्तिलाई सकुशल उद्धार गरेको र घटनामा संलग्न रहेको आरोपमा चार जनालाई पक्राउ गरेको जनाएको छ।
जिल्ला प्रहरी कार्यालय सर्लाहीले मंसिर ३ गते जारी गरेको प्रेस विज्ञप्तिअनुसार गत कात्तिक २७ गते राति करिब १० बजे सर्लाहीको गोडैता नगरपालिका–८ निवासी ३७ वर्षीय सुनील कुमार रायलाई कौडेना गाउँपालिका–२ स्थित फूलपरासी भन्ने स्थानबाट अपहरण गरिएको थियो।
प्रहरीका अनुसार चार–पाँच जनाको समूह दुईवटा मोटरसाइकलमा आएर रायलाई कुटपिट गर्दै अपहरण गरी पिकअप गाडीमा हालेर बरहथवातर्फ लगेको थियो। घटनाबारे रायका आफन्तले इलाका प्रहरी कार्यालय बरहथवामा जानकारी गराएपछि प्रहरीले अनुसन्धान तथा खोजतलास सुरु गरेको थियो।
खोजतलासका क्रममा कात्तिक २८ गते बिहान करिब ९ बजे बरहथवा नगरपालिका–५ निवासी राजकुमार महतोको घरमा रायलाई कोठाभित्र बन्धक बनाइएको अवस्थामा फेला पारी सकुशल उद्धार गरिएको प्रहरीले जनाएको छ। सोही स्थानबाट सन्तोष कुमार महतोलाई नियन्त्रणमा लिइएको थियो।
त्यसपछि अनुसन्धानका क्रममा सोही दिन बरहथवा नगरपालिका–६ स्थित दुग्ध डेरी चोकबाट घटनामा संलग्न रहेको आरोपमा थप व्यक्तिहरू पक्राउ परेका हुन्।
प्रहरी विज्ञप्तिमा पक्राउ परेकाहरूको विवरण यसप्रकार छ :
१. सर्लाहीको बरहथवा नगरपालिका–५ निवासी ५४ वर्षीय विश्वेश्वर महतो।
२. सोही स्थानका २७ वर्षीय प्रमोद कुमार महतो।
३. सोही स्थानका २५ वर्षीय अमित कुमार महतो।
४. सोही स्थानका ३१ वर्षीय सन्तोष कुमार महतो।
प्रहरीका अनुसार घटनाको प्रारम्भिक अनुसन्धानमा उनीहरूबीच वैदेशिक रोजगारीसम्बन्धी विवाद रहेको र सोही विषयको रकम जबर्जस्ती असुल गर्ने उद्देश्यले अपहरण गरिएको खुलेको छ।
त्यसैगरी, घटनालाई अतिरञ्जित गर्ने उद्देश्यले अपहरणकारीहरूले फिरौती माग गरेको र फिरौती रकम तिर्न जाँदा तीन लाख रुपैयाँ एवं गरगहना लुटिएको भन्दै गलत सूचना दिएको प्रहरीको दाबी छ। उक्त घटनासँग सम्बन्धित अन्य दुई जनालाई समेत नियन्त्रणमा लिएर अनुसन्धान भइरहेको जिल्ला प्रहरी कार्यालय सर्लाहीले जनाएको छ।
अपहरणमा परेका व्यक्तिको सकुशल उद्धार र घटनामा संलग्न रहेको आरोपमा चार जनाको पक्राउसँगै यस घटनाले वैदेशिक रोजगारीसम्बन्धी विवाद, आर्थिक लेनदेन र त्यसका नाममा हुन सक्ने आपराधिक गतिविधिबारे पनि प्रश्न उठाएको छ। घटनाको थप अनुसन्धान भइरहेको प्रहरीले जनाएको छ।
…..
ओझेलका खबर — खबर भित्रको खबर
…..
पोस्ट मिति : ४ मंसिर २०८३ समय : बिहान ९ .१५
…….
सन्तुलित आलोचना, रचनात्मक सुझाव र मार्गदर्शनमूलक टिप्पणीलाई स्वागत छ। गालीगलौज तथा अमर्यादित टिप्पणी नगरौँ।
|
ओझेलका खबरलाई फेसबुक, एक्स, इन्स्टाग्राम वा टिकटकमा फ्लो गर्नुहोस्। कार्यक्रम ओझेलका खबर र ओझेलका खबर डटकम विशेष रिपोर्टहरु हेर्न Ojhelka Khabar TV युट्युब च्यानल सब्स्क्राइब गर्नुहोस्। |









