ठूलो आवाज निकाल्ने गरी स्वरूप परिवर्तन गरिएका ५६ मोटरसाइकल तथा स्कुटर प्रहरी नियन्त्रणमा

काठमाडौँ । चाडपर्वका बेला बस्ती तथा सडकमा ठूलो आवाज निकालेर ध्वनित्रास फैलाउने गरी स्वरूप परिवर्तन गरिएका ५६ वटा दुईपाङ्ग्रे सवारीसाधनलाई प्रहरीले नियन्त्रणमा लिएको छ।

सर्वसाधारणलाई सुरक्षित, शान्त र भयमुक्त वातावरणमा आवागमनको व्यवस्था मिलाउने उद्देश्यले सञ्चालन गरिएको विशेष सुरक्षा तथा निगरानी अभियानका क्रममा जिल्ला प्रहरी परिसर काठमाडौँले ती सवारीसाधन नियन्त्रणमा लिएको हो।

जिल्ला प्रहरी परिसर काठमाडौँ तथा मातहतका वृत्त र प्रभागबाट खटिएका प्रहरी टोलीले राजधानीका विभिन्न स्थानमा गरेको चेकजाँचका क्रममा साइलेन्सर परिवर्तन गरी ठूलो आवाज निकाल्ने ५२ वटा मोटरसाइकल र ४ वटा स्कुटर नियन्त्रणमा लिएका हुन्।

जिल्ला प्रहरी परिसर काठमाडौँका प्रवक्ता एवं प्रहरी उपरीक्षक दानबहादुर थापाका अनुसार नियन्त्रणमा लिइएका सबै सवारीसाधनमाथि थप अनुसन्धान तथा आवश्यक कारबाही प्रक्रिया अघि बढाइएको छ।
सडक सुरक्षा र वातावरणीय शान्ति भंग हुने गरी सवारीसाधनको स्वरूप परिवर्तन गरी चलाउनेमाथि निगरानी थप कडा पारिने प्रहरीले जनाएको छ।
…….
पोस्ट मिति : २०८३ कात्तिक २५ गते समय : बेलुका ८. ५५ बजे  
…….
ओझेलका खबर — खबर भित्रको खबर
………
सन्तुलित आलोचना, रचनात्मक सुझाव र मार्गदर्शनमूलक टिप्पणीलाई स्वागत छ। गालीगलौज तथा अमर्यादित टिप्पणी नगरौँ।