भोटेकोशी बाढी : भारतमा ९ सहित १,२२७ शव फेला

रसुवाको भोटेकोशीमा आएको विनाशकारी बाढीपछि भारतमा फेला परेका ९ शवसहित हालसम्म १ हजार २२७ जनाको शव फेला परेको छ।

प्रहरीका अनुसार रसुवामा ४५, नुवाकोटमा १५५, धादिङमा ५९, चितवनमा ३४८, गोरखामा ६६, तनहुँमा ३८, नवलपरासी पूर्वमा २१७, नवलपरासी पश्चिममा १९० र भारतमा ९ शव फेला परेका हुन्।

फेला परेका शवमध्ये १ हजार ११३ जनाको लासजाँच मुचुल्का सम्पन्न भएको छ भने ९५ शव आफन्तलाई बुझाइएको प्रहरीले जनाएको छ।

पहिचानका लागि आवश्यक प्रक्रिया र डीएनए नमुना सङ्कलनपछि ८६९ शव व्यवस्थापन गरिएको छ। व्यवस्थापन गरिएका शवमध्ये १७४ महिला, २५७ पुरुष र ४३८ जनाको लिङ्ग पहिचान हुन सकेको छैन।

प्रहरीका अनुसार पहिचान हुन नसकेका ९११ शवको विवरण नेपाल प्रहरीको वेबसाइटमा राखिएको छ।

बाढी प्रभावित क्षेत्रमा उद्धार, खोजी, राहत वितरण तथा शव व्यवस्थापनका लागि हालसम्म ७ हजार ९१२ प्रहरी कर्मचारी परिचालन गरिएको छ। प्रभावित क्षेत्रबाट ६ हजार ५४१ जनाको उद्धार गरिएको छ भने ४ हजार ८५८ जना अझै बेपत्ता रहेको प्रहरीले जनाएको छ।

विभिन्न जिल्लाका होल्डिङ सेन्टरमा ३ हजार २२५ जना रहेका छन्। नुवाकोटमा २ हजार १२६, धादिङमा ३३१, रसुवामा ४३३ र काठमाडौंमा ३३५ जनालाई राखिएको छ।

प्रहरीले बाढीको जोखिममा रहेका परिवारलाई सुरक्षित स्थानमा स्थानान्तरण गर्नुका साथै स्थानीयवासी तथा विभिन्न निकायसँगको समन्वयमा उद्धार र खोजी कार्य जारी राखेको जनाएको छ। विभिन्न स्थानमा अवरुद्ध सडक खुलाउने कामसमेत भइरहेको प्रहरीले जनाएको छ।