वित्त आयोगको प्रतिवेदनमा मालिका प्रथम, धुर्कोट दोस्रो

गुल्मी: नेपाल सरकार, वित्त आयोगको गत आर्थिक वर्षको कार्यसम्पादन मूल्याङ्कन प्रतिवेदनमा गुल्मीको मालिका गाउँपालिका यस जिल्लाका सबै पालिकामध्ये सबैभन्दा बढी नम्बर ल्याएर प्रथम भएको छ। त्यस्तै धुर्कोट गाउँपालिका दोस्रो बनेको छ। यहाँका पालिकाहरूलाई वित्त आयोगबाट आज प्राप्त प्रतिवेदन अनुसार रेसुङ्गा नगरपालिका तेस्रो स्थानमा छ। विभिन्न १७ वटा सूचकमा ८१.९८% नम्बर प्राप्त गरी (मालिका) प्रथम भएको हो।

धुर्कोटले ८०.५२% प्राप्त गरेको छ भने रेसुङ्गाले ७६.७५% नम्बर प्राप्त गरेको छ। रेसुङ्गापछि छत्रकोटले ७६.६५% नम्बर प्राप्त गरेको छ। रुरुक्षेत्रले ७४.०८% नम्बर प्राप्त गरेको छ।

यसैगरी, सत्यवतीले ६८.५८% र कालीगण्डकीले ६५.९७% नम्बर प्राप्त गरेका छन्। गुल्मीदरबारले ६१.१२% नम्बर प्राप्त गरेको छ। चन्द्रकोटले ५६.३२% नम्बर प्राप्त गरेको छ। सबैभन्दा कमजोर इस्मा गाउँपालिकाले ५३.६९% र मुसिकोट नगरपालिकाले ५९.३८% नम्बर प्राप्त गरेका छन्।

मालिका र धुर्कोट गाउँपालिका प्रायः वर्षेनि उत्कृष्ट नम्बर प्राप्त गर्दै आएका छन्। यी दुई पालिकामा साविकको माओवादी केन्द्र र हालको नेपाली कम्युनिस्ट पार्टीका नेताहरूले नेतृत्व गर्दै आएका छन्।